Mill-24 sas-27 ta’ Frar 2026, id-Diretturi Nazzjonali Ewropej tal-Opri Missjunarji Pontifiċji ltaqgħu f’Heiligenkreuz, Vjenna, għal laqgħa kontinentali ospitata minn Missio Austria. Ingħaqdu flimkien aktar minn tletin rappreżentant, il-laqgħa kkombinat mumenti ta’ talb, riflessjoni u żjarat kulturali, u offriet lill-parteċipanti opportunità biex japprofondixxu l-viżjoni missjunarja kondiviża tagħhom.
Il-laqgħa ffokat fuq l-ispiritwalità tal-Opri Missjunarji Pontifiċji fid-dawl tal-anniversarju sinifikanti tal-100 sena tal-Jum Dinji Missjunarju, filwaqt li indirizzat ukoll inizjattivi u kollaborazzjoni futuri madwar l-Ewropa. L-artiklu li ġej jippreżenta riflessjoni personali dwar l-esperjenza, maqsuma minn Fr. Victor Agius, Direttur Nazzjonali ta’ Missio Malta, li joffri ħarsa lejn il-mumenti u t-temi ewlenin tal-laqgħa.
“Kemm nieħdu gost meta, darba f’sena, id-diretturi nazzjonali ta’ Missio Ewropej niltaqgħu flimkien. Din is-sena ltqajna fi Vjenna, l-Awstrija. Il-laqgħa saret fl-Abbazija antik ħafna tal-Benedettini, Heilgenkruz, ftit ’il barra minn Vjenna. Il-post jinstab f’bosk f’wied bi xmara għaddejja qrib l-abbazija fejn tħossok maqtugħ mill-istorbju u l-ġenn tal-ħajja mgħaġġla li ngħixu fiha lkoll kemm aħna.
Dawn il-ġranet ta’ bejn it-23 u s-27 ta’ Frar, kienu għal kulħadd mumenti ta’ mistrieħ, talb, riflessjoni fuq il-missjoni tagħna ta’ evanġelizzazzjoni, skambji ta’ esperjenzi u aġġornamenti fuq dak li Papa Ljun jistenna minna bħala Opra Missjunarja Pontifiċja. Ħadt gost nara kemm l-istil sinodali li l-Knisja tħeġġiġna ngħixu llum kien fl-aqwa tiegħu. B’rispett kbir, kull wieħed jisma’ lill-ieħor u jirċievi dak li jisma’ bħala don ta’ mħabba Nisranija. Kemm ideat sbieħ u ġodda ħarġu! Verament tħoss ċar li kien l-Ispirtu s-Santu li kien qed imexxina. Kellna diversi mumenti li fihom wieħed seta’ jsemmi xi diffikultajiet li kien għaddej minnhom u kif jaħseb li jista’ jsolvihom. Tkellimna wkoll kif nistgħu niċċelebraw, matul din is-sena, l-ewwel ċentinarju tal-Ħadd Dinji Missjunarju, li jaħbat f’Ottubru, ħalli ngħinu lil kull Nisrani jħossu msejjaħ biex ikun missjunarju.
Però dawn il-ġranet ma kinux biss xogħol, imma xi ftit turiżmu wkoll fejn Patri Karl, id-direttur nazzjonali tal-Awstrija spjegalna l-wirt storiku ta’ pajjiżu. Dakinhar kellna laqgħa sabiħa għand in-Nunzju Appostoliku tal-Awstrija fejn kompla jgħidilna fuq is-sbuħija tal-poplu u l-Knisja Awstrijaka, li mbagħad rajniha konkretament, meta familja tal-post stednuna naraw il-kantina moderna ta’ fejn jagħmlu aktar minn mitt elf flixkun inbid fis-sena mid-dwieli tagħhom. Naturalment, offrewlna nduquh abbondantament ma’ ċena eskwiżita akkumpanjata minn mużika tradizzjonali Awstrijaka mill-aqwa.
Hekk ikkonkludejna din il-laqgħa annwali u kulħadd reġa’ lura lejn pajjiżu energizzat sabiex ikompli jaħdem u jaqdi lill-Knisja u l-poplu tiegħu ħalli aħna, bħala Missio, inkomplu nibnu kultura evanġelika fejn kulħadd jaħseb u jaqdi lil xulxin biex insiru ħaġa waħda kif jixtieq Ġesù.”
